Сүйүү таптым...
Сүйүү таптым, бүт сүйүүдөн өзгөчө,
Бул сүйүүнү көптөр билбейт дүйнөдө.
Сүйүү таптым, өңү эч качан өчпөгөн,
Сүйүү таптым, түбөлүккө өтпөгөн.
Сүйүү таптым, берген сайын көбөйүп,
Бекемделип, гүлдөгөн да, көктөгөн.
Сүйүү таптым, бүт сүйүүдөн башкача.
Сүйүү таптым, ысык, ыйык, таптаза.
Сүйүү таптым, эч кимге да, эч качан,
Карабаган даража, шарт, акчага.
Соодалашпай, эсептешпей, күтпөстөн,
Сүйүү билүү – чынында эле башкача...
Сүйүү таптым, бүт сүйүүдөн жеткилең,
Адам затын өлбөстүккө жеткирген.
Ооздуктаган оору, азап, арманды,
Оттой жалмап, жалтанбаган эч кимден.
Тапкан сүйүүм үмүт берип жашоомо,
Таңым атты, тагдырыма кеч кирген.
Сүйүү таптым, көп кырдуу, көп жагы бар,
Сүйүү таптым, күндөн ысык табы бар.
Тоскоолдорду багынта алган, талкалап,
Көйгөйлөрдү көгөндөчү алы бар.
Сүйүү таптым, батпас күнү, таңы бар.
СҮйүү таптым, айтып бүткүс даамы бар.
Сүйүү таптым, түгөнбөгөн, чалкыган,
Сүйүү таптым, дене, рух, жан балкыган.
Баалуу болгон бардык кадыр баркыңан,
Сүйүү таптым, кымбат турган алтындан.
Тапкан сүйүүм – Жараткандын сүйүүсү,
Ал сүйүүдөн аалам түгөл жаркыган.
Мындай сүйүү көрдүң беле деги сен?
Мүмкүн сени тагдыр калчап, жериген?
Үмүт үзүп койгондурсуң кол шилтеп,
Бакыт күтпөй эртең келечегиңен.
Анда келгин, жетик сүйүү сырларын
Айтып берем бүгүн, анын ээси – мен.
Рух, дене, жан дүйнөнү балкыткан,
Төгөрөгү төп келишкен – айкалыш.
Билгиң келсе ал сүйүүнү замандаш.
Мени менен сөзсүз түрдө байланыш.