Сурагыла, ошондо силерге берилет...
“Сурагыла, ошондо силерге берилет. Издегиле, ошондо табасыңар. Тыкылдаткыла, ошондо силерге эшик ачылат. Анткени сураган адам алат, издеген адам табат жана тыкылдаткан адамга эшик ачылат” (Матай жазган Жакшы Кабар 7, 7 – 8).
Кудай бар экендигин кантип билүүгө болот?
Жер жүзүндө кандайдыр бир Кудайга, сыйкырдуу күчкө (рухка) же өздөрүнүн түшүнүгүнөн сырткары турган бир нерсеге ишенбеген бир да эл, бир да уруу жок. Бул өз алдынча бөлүнүп жашаган, башка маданияттарга жуушпаган, айрыкча Жакшы Кабарды билбеген урууларга да тиешелүү. Эмне үчүн мындай? Баарыбыз көзгө көрүнүп турган нерселерден көзгө көрүнбөгөн Жаратканга ыклас буруу жөндөмдүүлүгүнө ээбиз. Автомобиль, саат, жада калса, топчу же кнопка өзүнөн өзү пайда болуп калганына эч ким ишенбейт. Ошондуктан Пабыл Жаңы Келишимде мындай деп жазат: “Дүйнө жаратылгандан бери Кудайдын көзгө көрүнбөгөн табияты: түбөлүктүү күчү жана кудайлыгы Анын жараткан нерселерин карап чыгуу аркылуу көрүнөт. Ошондуктан бул адамдар актана алышпайт”(Рим. 1, 20). Жаратылыштан гана биз Кудай бар экендиги жөнүндө , Анын ой жөндөмүнүн байлыгы жана күчү жөнүндө жыйынтык чыгарсак болот, бирок Анын мүнөзү (Анын сүйүүсү, ырайымдуулугу, боорукердиги) жөнүндө билүү мүмкүн эмес. Ошон үчүн бизге Библия берилген.
Эмне үчүн Кудайды көз менен көрүү мүмкүн эмес?
Адам ата менен Обо эне – Кудай жараткан биринчи кишилер Аны менен сүйлөшүп жашашчу, Аны жүзмө – жүз көрө алышчу.Күнөө адамды Кудайдан бөлүп салган. Кудай ыйык, Ал ар бир күнөөнү жек көрөт, ошондуктан Аны менен болгон алгачкы баарлашуу үзүлүп калган. “Ал - ... адам жетпей турган жарыкта жашаган Кудай” (1 Тим. 6, 16 а), ошондуктан биз Ага өлгөндөн кийин, Анын жайына киргенде гана кезигебиз. Ал жакка Ыйса Машайак аркылуу гана кирүүгө болот: “Атама Мен аркылуу гана барууга болот, Менсиз эч ким бара албайт” (Жакан 14, 6б).
