Ыйса Машайак - Өмүр Наны
Галилея көлү Палестинанын түндүк бөлүгүндө жайгашкан. Ыйсанын шакирттеринин бир нечеси Галилея көлүнүн жээгиндеги шаарлардан чыккан балыкчылар болушкан. Галилеялыктарды окутууга Ыйса көп убактысын бөлгөн. Көп учурда адамдар Ыйсаны көрүү жана Анын сөздөрүн угуу үчүн алыстан келишкен. Көбү Ыйса ооруларынан айыктырат деген үмүт менен келишкен. Сокур, шал, жин оорулуу адамдар Ыйсага келгенде сакайышкан. Күндөрдүн биринде Ыйса жана Анын шакирттери бир кайгылуу окуя угушту. Бул Ирод падышанын буйругу боюнча Жакан Чөмүлдүрүүчүнүн башы алынгандыгы жөнүндөгү кабар болчу. Ирод өзүнүн бир тууганы Филиптин аялы Иродия менен ойноштук кылып жүргөн. Мунун чоң күнөө экендигин Жакан Ироддун бетине айткан. Ушул себептүү Жакан зынданга салынып, андан соң башы алынган. Муну укканда Ыйса жана Анын шакирттери чоң кайгыга батышты. Бир аз убакытка жалгыздыкта болуу үчүн, алар Галилея көлүнүн чыгыш тарабындагы тоолорду көздөй баратышты. Бирок адамдар Ыйсанын ал жерде экендигин билип алышып, Аны көрүп, сөздөрүн угуу үчүн кайрадан агылып келе башташты. Жүздөгөн оорулуу адамдар келип, ооруларынан айыгышты. Кудай жөнүндөгү Ыйсанын кудуреттүү сөзүн ырахаттанып угушуту.
Убакыт тез өтүп, кеч да кирди. Адамдар тоого түнөбөө үчүн үйлөрүнө кайтуулары керек эле. Ыйса шакирттерине: “Элди тойгузуу үчүн, нанды кайдан сатып алабыз” – деди. Ал бул сөздү аларды сыноо үчүн айтты. Өзү болсо эмне кылуу керектигин билген. Шакирттер таң калышты! Алар: “Ар бирине бир аздан бергенде да, аларга эки жүз күмүш тыйынга келе турган нан жетпейт”, - деп жооп беришти. Ыйса: “Биз аларды тоюндуруубуз керек”, - деди. Ошондо Андрей аттуу шакирт: “Ушул жердеги бир балада беш арпа нан жана эки кичинекей балык бар – Бирок ал ушунча көп кишиге эмне болмок эле?”, - деди. Ыйса аларга: “Элди жерге отургузгула”, - деди. Аялдар менен балдарды эсептебегенде, ал жердеги адамдардын саны 5000 эле. Ыйса асманга көз чаптырып, беш нан, эки балык үчүн Кудайга ыраазычылык келтирди да, шакирттерине берди. Алар отургандарга таратышты. Эл тойгондон кийин, аларды үйлөрүнө жиберди. Алар эл жеген беш арпа нандын артканын жыйнашканда он эки себет толду.
Кеч киргенде шакирттери көлгө барып, бир кайыкка түшүштү да көлдүн наркы өйүзүнө өтүүгө бет алышты. Алар Галилея көлүн сүзүп өтүүгө аракеттеништи. Ыйса болсо сыйынуу үчүн тоодо калган эле. Ал түнү шакирттер кайык ичинде чоң кыйынчылыкка дуушар болушту. Шамал күчөп, көл толкуй баштады. Алты саатка жакын убакыт өткөнүнө карабастан, шакирттер болжол менен беш чакырым гана аралыкты сүзүп өтүшкөн эле.
Ыйса тоодо сыйынып жатса да, шакирттеринин кайык ичиндеги кыйынчылыктарын билген. Шакирттерин сүйгөндүктөн, аларга жардамга жөнөдү. Жээктен суу үстү менен басып кайыкты көздөй жөнөдү. Таңкы саат төрт чамасында шакирттер күтүлбөгөн жерден аларды көздөй суу үстүндө басып келаткан Ыйсаны көрүштү. Адегенде алар Ыйсаны элес экен деп ойлоп коркуп кетишти. Бирок Ыйса аларга: “Коркпогула. Бул – Менмин” – деди. Шакирттер абдан кубанып кетишти. Алар Ыйсаны кайыкка түшүрүп аллмакчы болушту. Бирок бороон дароо тынчып, кайык ошол замат алар бет алган жээкке жетип калды.
Бул окуялар – Ыйса Машайак тууралуу бизге көптөгөн маанилүү нерселерди окутат. Тоораттын биринчи китебинде биз Кудай бардык нерсени Өзүнүн Сөзү аркылуу жараткандыгын окуганбыз. Ыйык Жазуу болсо бизге Сөздүн адамга айлангандыгын, ал Адам – Ыйса Машайак экендигин көргөзөт. Дүйнөнү жараткан ошол Кудайдын Сөзү башка дагы кереметтүү иштерди кылууга ар дайым кудуреттүү. Ал Сөз бир нече үзүм нан менен бир нече балыктын беш миңден ашуун адамды тойгуза турган азык жарата алат. Ал суу үстүндө басып, ташкындаган деңизди мелмилдеген тынч көлгө айландыра алат. Ыйса Машайак Кудайдын Сөзү болгондуктан, Кудайдын ушул кереметтүү иштерин жасай алган.
Ыйса тоюундурган адамдар абдан кубанычта болушкан. Эртеси алар кайыктарына түшүп, Ыйсаны издешти. Аны тапканда, кубанычтары коюндарына батпай сүйүнүштү. Анткени алар бул жолу да кечээгидей мол азык алууга үмүттөнүшкөн.
Ыйса мындай деп айтты: “Мен асмандан келип түшкөн Өмүр Нанымын; бул нанды ким жесе, түбөлүк жашайт. Мага ким ишенсе, ал түбөлүк өмүргө ээ болот” (Жакан 6:34). Ыйса дагы мындай деди: “Күнүмдүк тамак үчүн эмес, түбөлүк өмүр берүүчү тамак үчүн аракеттенгиле”. Алар: “Кудайдын иштерин аткарыш үчүн эмне кылышыбыз керек” – деп сурашты. Ыйса аларга “Ал кимди жиберсе, Ошого ишенгиле. Кудайдын иши – мына ушул”, - деп жооп берди. Ошондо алар: “Кандай керемет көрсөтөсүң? Биз көрүп сага ишенип калалы. Кана. Эмне кыласың?”
Ыйык Жазууда: “Кудай аларга асман нанын берди, деп жазылгандай, ата-бабаларыбыз чөлдө манна жешкен”, - дешти. Ыйса: “Ата-бабаларыңар чөлдө манна жешти, өлүштү. Ал эми асмандан түшкөн нанды жеген адам өлбөйт”, - деди. Алар: “Мырза, бизге дайыма ошондой нан берип турчу!” – деп жиберишти. Ыйса: “Мен асмандан түшкөн тирүү нанмын. Бул нанды жеген адам түбөлүк жашайт”, - деди. Бул Ыйса Машайакка ишенгендер асманда түбөлүк жыргап жашашат дегенди билдирет.
Ушул сөздөн кийин бир топ адамдар Ыйсанын артынан ээрчибей калышты. Алар Ыйсанын Машайак экендигине ишене алышкан жок. Ошондо Ыйса шакирттеринен: “Силердин да кеткиңер келеби?” – деп сурады. Петир аттуу шакирт: “Теңир, биз кимге бармак элек? Түбөлүк өмүр берүүчү сөздөр Сенде. Биз Сенин Кудайдын Ыйыгы – Машайак экениңди билип, Сага ишенип калдык”, - деп жооп берген.